Luk 14 | WSK | STEP | Jesus Sabbath tom te Pharisee nunga kari biya bo ko kawam te ilak na naukko namaram. Se Pharisee mu ko sikina arungu ninguru arikuawuwakasan, nu munan bo kiaruk bore ko.

Luke 14

Jesus Sabbath tom te kari bo kumik yu moram wore nungam

1 Jesus Sabbath tom te Pharisee nunga kari biya bo ko kawam te ilak na naukko namaram. Se Pharisee mu ko sikina arungu ninguru arikuawuwakasan, nu munan bo kiaruk bore ko. 2 Se kari bo suwik kuting yu moram mu tom mu te nu ago kumik duap te bagaram. 3 Se Jesus Pharisee alo, se Law Den ko kausa kari alo mu nunga isuam, “Ana kariimet kuera ago wore Sabbath tom te am nunga nungurnak agi mena e?”

4 Bare nuna am kawus maman. Se nu kari kuera ago mu tam ale nungam, ale beteram se namaram. 5 Asele nu nunga maonam, “Se nina ninga kuriang agi ninga bulmakau agi Sabbath tom te mutim ningi dagulok, mu nina tom mu te la me patowaral i?” 6 Se nuna den mu koma balmonko me terong.

Kari numi ira kutuwuso mu Kaem nu patawu kualala beteso

7 Jesus kari na namonko taikasan bare kuwim nup ago wore te la dagimonko kaeyakasan se nungarkikaso. Ale ko nu den ira imi nunga maonam, 8 “Tom ni kari bo imet kari numi gia ko na inang biya bitiruk ale nika aurok se namar, mu kuwim ningo nup ago mu te me dagiko. Mu ni me ikisam, inang kotam mu kari nup biya nika kiaram mu ago auram se taiwoso agi mu ni me ko ikisam. 9 Uwuta mu aking kari ka auram mu kete tairuk ale iwita ka manuk, ‘Ni kuwim sumu bitar se kari nup biya nuam imi te daigokko,’ ma baluk, se ni doler ale kapar kuwim aliti mu te dagiko.

10 “Buta se ni kari bo ka aurok se na noko namar, mu ni kuwim aliti nup mena mu te dagiko. Ni uwuta bitar mu asele kari nika auram se namerem mu tairuk karkuk ale ka manuk, ‘Aga bo, ni tai kuwim kualala imi te dagiko!’ ma baluk, se ni kari sikina nomotam te nip biya aratukko. 11 Mu awuk, kari nu kota ko nup patawoso, mu Kaem nu ira kutuwurok se kapurukko. Bare kari kota ko nup ira kutuwuso ale nup mena ko iwita lagoso, mu Kaem nu nup biya tuokko.”

Kariimet nunga aru se taimon kerak na namonko ko munan

12 Se Jesus Pharisee kari nu auram se namaram ko kawam te ilak bagakaso wore maonam, “Ni na inang bo bitar, mu nika launuria, ka sikisaki, ka mayang geraga, se ka wonong suwan nungumik mel ago, mu me nunga aru se taimonko. Ni suwuta bitar, mu nuna aking nika na inang koma bita kisimonko. 13 Se umutang ko, ni na inang bitar, mu kariimet nunup mena, nungumik mel mena, nungumik guang memek, nusuwik memek, nomotam mena, mu nunga aru se kete taimon ale na inang mu namonko. 14 Ni butata bitar mu asele ni amilmilerko. Mu awuk, kari kituwura motam uwutata, mu nika na inang koma bita kisimonko me terong. Bare maingte, kariimet ningo diram mu nunga barasa ko tom mu te, Kaem ni munan yawara beterem mu ko koma yawara kisokkowo.”

Kari bo na inang biya beteram ale airam wore ko den ira

(Mat 22:1-10)

15 Se kari Jesus ilak na nowa mu den mu ikiman, ale bo Jesus maonam, “Kariimet Kaem ko na inang biya tom udagi bitirukko mu ningi dagimon, mu kariimet umu amilmil biya tamonko.” ^{▼▼Luke 14:15 Na inang biya: Rev 19:9.}

16 Bare Jesus den ira bo tala iwita maonam, “Kari bo na inang biya bitirukko, se nu kariimet suen biya na inang mu na ko tom te taimonko nunga maonam. 17 Se na inang na ko tom tai aratam, mu nu ko ura kari maonam, ‘Namar ale kariimet na yu biya imi ko taimonko ani girem nunga manem se anisan mu nunga manaru se taimonko,’ mam. Se nu namaram iwita nunga maonam, ‘Am tairalko. Mel suen biya nunguru sapaman.’

18 “Bare kari suen la am me namomonko la balukasan. Kari bo giram balam, ‘Aa mu butata, bare ani namirik kari aga auram mu me arigekko. Aninga ali bo iru diarem wore arigekko namasam.’ 19 Se kari bo tala balam, ‘Aa mu butata, bare ani namirik kari aga auram mu me arigekko. Ani bulmakau 10 nunga diarem, ale namirik ura te ilu ilu arigekko se,’ mam. 20 Se aking kari bo tala mu balam, ‘Ani aitakta imet taem ale namirikko me terong.’ ^{▼▼Luke 14:20 Kari imet tam: 1 Cor 7:29-33.}

21 “Se ura kari am peleram namaram ale na inang mu ko kotam mu maonam. Se nu gomang magaram se ko ura kari maonam, ‘Ni tairate namar wonong ko lage bibiya se ko lage gotektek te gerage ale, kariimet kituwura guat nunup mena, nungumik guang memek, nomotam posara, nusuwik memek, wore nunga manaru ale arungak kawam te tairko,’ mam. 22 Se ura kari mu namaram ale arungak tairam ale maonam, ‘Kari biya, ani nika den balem butata beterem, bare kuwim sang am ipi aniso.’

23 “Se kari biya mu ko ura kari maonam, ‘Kapar guringi ningam ko lage karo ale imikiri nunga gi ale arungak tai utu nagurko,’ mam. ‘Aninga kawam naung terong maukko angamang aniso. 24 Se ani nina suen la ninga manorsam, kariimet ani girem nunga aurem se me taiman, mu aninga na ningo imi me namonkowo.’”

Kari Jesus kowom karukko mu ninguru ikia tauk ale asele

(Mat 10:37-38)

25 Kariimet suen biya nunguningkiri Jesus ilak Jerusalem namakasan, se nu koma gurugam ale nunga maonam, 26 “Awiriya aningate tairukko, bare nu ko nuamnuet, ko nuwus kuriang, launuria korasari nunga ikia, se nu kota ko ikia, mu suen la me buring tuok, mu nu aninga olekem ko bagurukko me terong. ^{▼▼Luke 14:26 Ana Jesus ninguru ko kuenakko: Mat 10:37; Luke 18:28-30.} 27 Uwutatala, awiriya ani agowom karukko bare kota ko tam kangono me giok, mu nu aninga olekem ko bagurukko me terong.

28 “Se butatatala, kari bo kawam kalokko mu nu giriso dagiso ale ko ikia taso, noko manga kawam te kalo kutuwurokko terong mam agi mena agi mu ko ikia taso. 29 Nu buta me bitiruk, ale am ngatalek i waruk, paren moruk, bare aking manga ko tukunang aruk, mu nu kawam mu kalo kutuwurokko me terong, se kariimet sang aringimon gusirmon, 30 ale balmon, ‘Kari umutang kawam ura duap beteram bare me kalo kutuwuram!’ ma balmonko.

31 “Aking king bo ko kager kari 10 thousand se nu king bo ilak kagerurukko, mu nu giriso dagiso ale ikia taso, noko kager kari 10 thousand mu nuna king mu ko kager kari 20 thousand mu arungak kagermonko terong maman agi mena agi mu ko ikia taso. 32 Nu ikiok nuna me terong maman ikiok, mu tom king mu awar bagoso, mu nu kari sang nunga awurok se nukote namomon ale kager barasuk ko den mu menawumonko ago kaemonko. 33 Butatatala, awiriya aninga olekem bagurukko kueruk, mu nu ko mel suen la buring tui sapuruk mu asele agowom karukko.

Olekem gomang ningi nunguning menaram namoso, mu gagi seselak menaram iwitata

(Mat 5:13; Mark 9:50)

34 “Gagi na inang te kamara mu mel yawara, bare ko seselak menaruk, mu awuk ta nungurmon se aking seselak gemuruk? Mena. 35 Gagi ko seselak menaram mu ura bo te betera ko me terong, am wara ko. Nina nedegewa ago agi mu, den imi ninguru ikialko.”